„Fannst eins og barnið myndi ekki koma ef ég ætti ekki þennan ákveðna hlut“. Upplifun frumbyrja af áhrifum samfélagsmiðla á kauphegðun þeirra

Fyrsta meðganga verðandi mæðra er mikill umbreytingatími og hjá flestum hlaðinn nýjum og áður óþekktum tilfinningum. Frumbyrjur eru mæður sem eiga von á sínu fyrsta barni og því ganga þær að mörgu leiti blindandi inn í það ferli sem fyrsta meðgangan er. Ferlið hefst á jákvæðu óléttu prófi og endar þegar barnið fæðist. Allt þetta ferli eru mikil tímamót í lífi ungra frumbyrja og allar þessar nýju áður óþekktu tilfinningar geta leitt þær í margskonar óvissu. Í slíku ástandi er líklegt að það sé auðvelt að hafa áhrif á verðandi frumbyrjur og kauphegðun þeirra þegar kemur að vörum tengdum barninu. Markmið rannsóknarinnar var að kanna upplifun frumbyrja af áhrifum samfélagsmiðla á kauphegðun þeirra á vörum tengdum barninu, bæði á meðgöngunni og fyrsta ári barnsins. Notast var við rýnihóp við rannsóknina, hópurinn samanstóð af fimm mæðrum sem komu sama í eitt skipti í heimahúsi til að ræða efni rannsóknarinnar undir handleiðslu höfundar. Leitast var við að kanna hvers konar vörur frumbyrjurnar hefðu keypt og fá þær til að tengja kaupin við samfélagsmiðla. Þannig var reynt að kanna upplifun þeirra af samfélagsmiðlum og hvernig þeir höfðu áhrif á kauphegðun mæðranna varðandi þær vörur er varðaði barnið. Niðurstöður sýndu að frumbyrjurnar upplifðu mikla óvissu á meðgöngunni sem leiddi til þess að þær leituðu víða að upplýsingum og þá sérstaklega á samfélagsmiðlum. Þegar kom að kauphegðun frumbyrjanna þá leituðu þær helst ráða hjá Facebook hópum. Frumbyrjurnar urðu að eigin sögn fyrir miklum áhrifum frá því sem aðrar mæður sögðu. Það sem einkenndi kauphegðun þeirra á meðgöngunni einna helst var að þegar þær sáu vöru á samfélagsmiðlum sem einhver í þeirra áhrifa umhverfi átti, fannst þeim sú vera eini valkosturinn í boði. Einnig kom í ljós að það var áberandi mikill munur á kauphegðun milli meðgöngunnar og eftir fæðingu. Frumbyrjurnar keyptu mun meira af óþarfa hlutum á meðgöngunni út frá áhrifum frá samfélagsmiðlum en eftir fæðingu. Samkvæmt niðurstöðum rýnihópsins bendir flest til þess að samfélagsmiðlar séu mikilvægur þáttur í upplýsingaleit frumbyrja og leita þær þangað í miklu mæli fyrir þau ráð sem þær telja sig þurfa